બોલિવૂડ ફેન્સ માટે દિવાળી બોનસ ને બદલે ડબલ બોનાન્ઝા, આજે રીલિઝ થશે સિંઘમ અગેઈન અને ભુલભુલૈયા ૩

બોલિવૂડ ફેન્સ માટે ક્યારેક ક્યારે એવા સંજોગો સર્જાતા હોય છે કે તેમના માટે તે દિવસ દિવાળી બોનસ બની જતો હોય છે. વર્ષ ૨૦૨૪ની દિવાળી કંઈક એવી જ દિવાળી સાબિત થઈ રહી છે કારણ કે આજે બોક્સ ઓફિસ પર રીલિઝ થશે સિંઘમ અગેઈન અને ભુલભુલૈયા ૩. આ ઘટના બોલિવૂડ ફેન્સ માટે દિવાળી બોનસ નથી પરંતુ ડબલ બોનાન્ઝા સાબિત થશે.

૨૦૨૪ની દિવાળી બોલિવૂડ અને બોલિવૂડના ફેન્સ માટે ખાસ બની રહેવાની છે. આજે બોક્સ ઓફિસ પર બોલિવૂડની સૌથી સફળ ફ્રેન્ચાઈઝીમાંથી ૨ મોટી એવી સિંઘમ અને ભુલભુલૈયાની સિક્વલ રીલિઝ થઈ રહી છે. આ બંને ફ્રેન્ચાઈઝીની આ ૩જી ફિલ્મ છે. જેમાં સિંઘમ અગેઈન અને ભુલભુલૈયા ૩નો સમાવેશ થાય છે.

સિંઘમ અગેઈનની વાત કરીએ તો આ ફિલ્મ એક માસ અને ટિપિકલ મસાલા ફિલ્મ છે. જેનું ઝોનર એકશન કોમેડી છે. આ ફિલ્મમાં બોલિવૂડના દિગ્ગજ કલાકારોનો કાફલો છે. જેમાં અજય દેવગણ, કરીના કપૂર, અક્ષય કુમાર, ટાઈગર શ્રોફ, રણવીર સિંહ, દિપીકા પાદુકોણ, અર્જુન કપૂર વગેરે. આ ફિલ્મની સ્ટોરી રામાયણની પૃષ્ઠભૂમિ પર આધારિત છે. જેમાં અજય દેવગણ પોતાની પત્નીને બચાવવા વિદેશ સુધી જોખમો ખેડતો જોવા મળશે. કહેવાઈ રહ્યું છે કે સર્કસ ફિલ્મની નિષ્ફળતા બાદ રોહિત શેટ્ટીએ આ ફિલ્મને સફળ બનાવવા કોઈ કસર છોડી નથી.  

ભુલભુલૈયા ૩ની વાત કરીએ તો આ ફિલ્મ હોરર કોમેડી ઝોનરની ફ્રેન્ચાઈઝી ભુલભુલૈયાની સીક્વલ છે. આ ફ્રેન્ચાઈઝીની પ્રથમ ફિલ્મમાં અક્ષય કુમારે મુખ્ય ભૂમિકા ભજવી હતી અને ફિલ્મ ડાયરેક્ટર હતા પ્રિયદર્શન. હવે આ ફ્રેન્ચાઈઝીમાં નવા ડાયરેકટર અને હીરોની એન્ટ્રી થઈ ગઈ છે. જેમણે ભુલભુલૈયા ૨ બનાવી હતી. જેના ડાયરેક્ટર હતા અનીસ બઝમી અને હીરો તરીકે કાર્તિક આર્યન હતો. આ જ જોડીએ ભુલભુલૈયા ૩ બનાવી છે. જો કે આ ત્રીજી ફિલ્મનું મુખ્ય આકર્ષણ માધુરી દિક્ષીત છે જેણે મોન્જુલિકાનો રોલ ભજવ્યો છે. ટ્રેલરમાં વિદ્યા બાલનને પણ મોન્જુલિકા તરીકે દર્શાવાઈ છે. તેથી આ ફિલ્મમાં દર્શકોને મોન્જુલિકાનો ડબલ ડોઝ મળવાનો છે.