ડોનાલ્ડ ટ્રમ્પે પુતિનને યુક્રેન યુદ્ધ અંગે આપ્યું અલ્ટીમેટમ, ટ્રમ્પની જીત બાદ પ્રથમ વાતચીત

ડોનાલ્ડ ટ્રમ્પે રશિયન નેતા પુતિન સાથે વાતચીત દરમિયાન યુક્રેનમાં સંઘર્ષ સમાપ્ત કરવાની જરૂરિયાત પર ભાર મૂક્યો હતો. ટ્રમ્પે આ મુદ્દે મોસ્કો સાથે ભવિષ્યની વાટાઘાટોમાં સામેલ થવાની ઈચ્છા દર્શાવી હતી. ટ્રમ્પની ચૂંટણી જીત્યા બાદ પુતિન સાથે પ્રથમવાર વાતચીત કરી હતી.

અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પે રશિયાના રાષ્ટ્રપતિ વ્લાદિમીર પુતિન સાથે વાત કરી છે. વોશિંગ્ટન પોસ્ટે પોતાના અહેવાલમાં જણાવ્યું હતું કે બંને નેતાઓ વચ્ચે વાતચીત થઈ હતી જેમાં ટ્રમ્પે પુતિનને યુક્રેનમાં યુદ્ધ ન વધારવા કહ્યું હતું. ડોનાલ્ડ ટ્રમ્પે રાષ્ટ્રપતિની ચૂંટણી જીત્યા બાદ બંને વચ્ચે આ પહેલી ટેલીફોનિક વાતચીત હતી.

રિપોર્ટમાં કહેવામાં આવ્યું છે કે ટ્રમ્પે ફ્લોરિડામાં તેમના માર-એ-લાગો રિસોર્ટમાંથી પુતિન સાથે ફોન પર વાતચીત કરી હતી. કોલ દરમિયાન, ડોનાલ્ડ ટ્રમ્પે પુતિનને યુરોપમાં મજબૂત યુએસ સૈન્ય હાજરીની યાદ અપાવી હતી, અહેવાલમાં જણાવાયું છે. આ સાથે યુક્રેન યુદ્ધનો ઉકેલ શોધવા માટે ચર્ચામાં વધુ રસ દાખવ્યો હતો.

ડોનાલ્ડ ટ્રમ્પે સંઘર્ષનો અંત લાવવાની જરૂરિયાત પર ભાર મૂક્યો હતો અને આ મુદ્દે મોસ્કો સાથે ભાવિ વાટાઘાટોમાં જોડાવવાની ઈચ્છા દર્શાવી હતી.  અગાઉ ડોનાલ્ડ ટ્રમ્પ અને યુક્રેનના રાષ્ટ્રપતિ વોલોડીમિર ઝેલેન્સકી વચ્ચે ફોન પર વાતચીત થઈ હતી, જેમાં અબજોપતિ ઉદ્યોગપતિ અને ટ્રમ્પના નજીકના સહયોગી એલોન મસ્ક પણ સામેલ હતા. ઝેલેન્સકીએ વાટાઘાટોને ઉત્તમ ગણાવી હતી અને અમેરિકન સરકાર સાથે સહકારની આશા વ્યક્ત કરી હતી.

Read Also India-Canada Relations: Trudeau Faces Criticism in Canada, Even Iranian Journalist Questions Him