લદાખમાં ચીનના સૈનિકોને પરત બોલાવાયા, સરહદ સંઘર્ષ કુણો પડ્યો

પૂર્વી લદ્દાખમાં ઈન્ડિયા ચાઈના બોર્ડર, ડેપસાંગ અને ડેમચોકમાંથી ચીન સૈનિકોને પાછા ખેંચવાની પ્રક્રિયા પૂર્ણ થઈ ગઈ છે. હવે બોર્ડર પેટ્રોલિંગ શરૂ થશે. આ ઘટના બાદ ભારતીય સૈનિકોને પણ પરત બોલાવી લેવાયા છે. અત્યારે લદાખ સરહદે ભારત અને ચીન વચ્ચેનો સંઘર્ષ કુણો પડ્યો હોય તેમ લાગી રહ્યું છે.

પૂર્વી લદ્દાખના બે સંવેદનશીલ સરહદીય સ્થળોએથી સૈનિકોને પાછા હટાવવાની પ્રક્રિયા પૂર્ણ થઈ ગઈ છે. આ સંદર્ભે ભારતીય સેનાએ બુધવારે જણાવ્યું હતું કે પૂર્વી લદ્દાખના ડેપસાંગ અને ડેમચોકમાં ભારત અને ચીન વચ્ચે સૈનિકો પાછા ખેંચવાની પ્રક્રિયા આજે પૂરી થઈ ગઈ છે.

તેમણે કહ્યું કે સૈન્ય હટ્યા બાદ બંને પક્ષો ટૂંક સમયમાં પોતપોતાના વિસ્તારોમાં સંકલિત પેટ્રોલિંગ શરૂ કરશે. સૂત્રોના જણાવ્યા અનુસાર, પૂર્વી લદ્દાખના ડેપસાંગ અને ડેમચોકમાં ભારત અને ચીન વચ્ચે સૈનિકોની પરત લેવાની કામગીરી પૂર્ણ થઈ ગઈ છે. બંને પક્ષો દ્વારા ટૂંક સમયમાં સંકલિત પેટ્રોલિંગ શરૂ કરવામાં આવશે. ગ્રાઉન્ડ કમાન્ડર વાતચીત ચાલુ રાખશે. આવતીકાલે દિવાળી પર મીઠાઈની આપ-લે પણ કરવામાં આવશે.

ભારત લાંબા સમયથી ચાલી રહેલા આ વિવાદને ઉકેલવા માટે મથી રહ્યું હતું. જેથી આ ક્ષેત્રમાં ચીની આક્રમકતા શરૂ થાય તે પહેલાની સ્થિતિને સ્થાપિત કરી શકાય. ચીનના વિદેશ મંત્રાલયે જણાવ્યું હતું કે, બંને દેશોની સરહદી સૈનિકો સરહદી મુદ્દાઓ પરના કરાર અનુસાર સંબંધિત કામમાં રોકાયેલા છે. એક પ્રેસ કોન્ફરન્સ દરમિયાન ચીનના વિદેશ મંત્રાલયના પ્રવક્તા લિન જિયાને કહ્યું કે કામ સરળતાથી ચાલી રહ્યું છે.

21 ઓક્ટોબરે ભારતે પૂર્વી લદ્દાખમાં લાઇન ઓફ એક્ચ્યુઅલ કંટ્રોલ (LAC) પર પેટ્રોલિંગ કરવા માટે ચીન સાથે કરારની જાહેરાત કરી હતી, જેનાથી ચાર વર્ષથી વધુ સમયથી ચાલી રહેલા સંઘર્ષનો અંત આવ્યો હતો. અગાઉ, વડા પ્રધાન નરેન્દ્ર મોદીએ રશિયામાં બ્રિક્સ સમિટની બાજુમાં ચીનના રાષ્ટ્રપતિ શી જિનપિંગ સાથે મુલાકાત કરી હતી, જ્યાં બંને નેતાઓએ પૂર્વી લદ્દાખમાં LAC સાથે પેટ્રોલિંગ વ્યવસ્થા પરના કરારને આવકાર્યો હતો.

Read Also Two Major BJP Leaders Join Ajit Pawar’s NCP, Say ‘Following Our Leader Devendra Fadnavis’s Directions’