કેનેડિયન સીક્યોરિટી એજન્સીઓ વડાપ્રધાન મોદી વિરૂદ્ધ કરી રહી છે તપાસ, ચોંકાવનારો ઘટસ્ફોટ

કેનેડાની સરકાર, સુરક્ષા એજન્સી અને પોલીસ સતત એક પછી એક ભારત પર આરોપો લગાવી રહી છે. કેનેડા તરફથી ભારતીય રાજદ્વારીઓ પર ગંભીર આક્ષેપો કરવામાં આવ્યા છે અને અમિત શાહને પણ ઘેરવામાં આવ્યા છે. હવે કેનેડિયન એજન્સીઓ પણ પીએમ નરેન્દ્ર મોદી તરફ આંગળી ચીંધી રહી છે.

કેનેડાએ તેની ધરતી પર ખાલિસ્તાનીઓ પર હુમલા માટે ભારતના વડાપ્રધાન નરેન્દ્ર મોદી પર આંગળી ચીંધી છે. કેનેડિયન સુરક્ષા એજન્સીઓનું માનવું છે કે નરેન્દ્ર મોદીને બ્રિટિશ કોલંબિયામાં ખાલિસ્તાની હરદીપ સિંહ નિજ્જરની હત્યા અને અન્ય સંબંધિત ષડયંત્ર વિશે અગાઉથી જાણકારી હતી. આ દાવો કેનેડામાં ભારતના વિદેશી હસ્તક્ષેપની કામગીરીના ગુપ્તચર મૂલ્યાંકન પર કામ કરતા વરિષ્ઠ રાષ્ટ્રીય સુરક્ષા અધિકારીએ કર્યો છે.

ગ્લોબ એન્ડ મેલના અહેવાલ મુજબ, અધિકારીએ કહ્યું કે કેનેડિયન અને અમેરિકન ગુપ્તચરોએ ખાલિસ્તાની નિજ્જરની હત્યાની કાર્યવાહીને ભારતના ગૃહ પ્રધાન અમિત શાહ સાથે જોડી છે. નરેન્દ્ર મોદીના વિશ્વાસુ રાષ્ટ્રીય સુરક્ષા સલાહકાર અજીત ડોભાલ અને વિદેશ મંત્રી સુબ્રમણ્યમ જયશંકર પણ આ લૂપમાં હતા. આવી સ્થિતિમાં સ્પષ્ટ છે કે નરેન્દ્ર મોદી પણ આ બધી બાબતો જાણતા હશે.

અધિકારીએ કહ્યું છે કે કેનેડા પાસે એવા કોઈ મજબૂત પુરાવા નથી કે મોદી હત્યા વિશે જાણતા હતા પરંતુ એવું માની શકાય નહીં કે ભારતમાં ત્રણ વરિષ્ઠ રાજકીય વ્યક્તિઓ (અમિત શાહ, એસ જયશંકર અને અજીત ડોભાલ) આ હત્યા વિશે જાણતા ન હતા. ગ્લોબ એન્ડ મેલે આ દાવો કરનાર અધિકારીની ઓળખ જાહેર કરી નથી.

આ અઠવાડિયે બ્રાઝિલમાં G20 સમિટમાં, કેનેડિયન પીએમ જસ્ટિન ટ્રુડોએ કહ્યું કે તેમણે ભારતીય અધિકારીઓ સાથે તેમના દેશની વિદેશી-દખલગીરીની પ્રવૃત્તિઓ વિશે વાત કરી છે. ખાસ કરીને ખાલિસ્તાન તરફી આંદોલનના સભ્યોને નિશાન બનાવવા વિશે ટ્રૂડોએ જાણ્યું. તેમણે કહ્યું કે મારી પ્રાથમિકતા હંમેશા કેનેડિયનોની સુરક્ષા માટે ઉભા રહેવાની છે. આ વાતચીતનો હેતુ પણ આ જ છે.

Read Also PM Modi welcomed by Indian community in Brazil with Sanskrit prayers